VÆNTANLEG 19. JÚNÍ!

Á litlu skosku eyjunni Mure ætla Flora MacKenzie og unnusti hennar Joel loksins að ganga í það heilaga. Brúðkaupsundirbúningurinn gengur þó ekki sem skyldi  vegna þess að skötuhjúin eru ekki sammála um hvernig þau vilja hafa stóra daginn; Joel langar í látlaust brúðkaup en Floru dreymir um stóra veislu með vinum og vandamönnum.

Málin flækjast enn frekar þegar hin íðilfagra samfélagsmiðlastjarna Olivia mætir með áform um að halda brúðkaup aldarinnar á Klettinum — sama dag og Flora og Joel ætla að gifta sig. Í öllum hamaganginum stelast skólastýran Lorna og læknirinn Saif til að eiga leynilega ástarfundi. Þau þora ekki að gera nein áform um framtíðina þar sem ríkisborgararéttur hans sjálfs og drengjanna er í húfi og að auki stendur Saif frammi fyrir erfiðu vali eftir óvæntar fréttir frá Sýrlandi.

Hugljúf saga um vináttu, ást og söknuð.
 
Sjálfstætt framhald af Mure bókunum eftir skoska metsöluhöfundinn Jenny Colgan en bækur hennar hafa slegið í gegn hjá íslenskum lesendum.

Helga Soffía Einarsdóttir þýddi.