Hestar – útgáfuhelgi

Hestar – útgáfuhelgi

Höfundur: María Rán Guðjónsdóttir,


Kæru landsmenn, hold your horses! Nú um helgina munu Rán Flygenring og Hjörleifur Hjartarson fagna því að bók þeirra HESTAR er komin sjóðheit úr prentvélinni. Af því tilefni verða höfundarnir í Ásmundarsal um helgina þar sem þau: leiða saman hesta sína, setja sig á háan hest, sleppa fram af sér beislinu og árita bækur (að sjálfsögðu með hanska og í hæfilegri fjarlægð og að því gefnu að þau bæði séu við hestaheilsu). Teikningarnar í bókinni verða til sýnis og sölu ásamt sérstökum hestalitaveggspjöldum. Bókin verður á tilboðsverði og fylgir hestalitabók öllum seldum bókum um helgina.

Rán og Hjörleifur verða á staðnum milli kl. 13:00 og 16:00 laugardag og sunnudag. Hjörleifur les upp úr bókinni kl. 14:00 og 15:00, báða dagana, og verður upplestri og spjalli streymt beint á Facebook-síðu Angústúru og instagram-síðu Ásmundarsalar.

Munið: Það er óþarfi að beygja skeifu og ríða skæting þótt við gefum okkur hvorki lausan tauminn né hesthúsum kökum. Aðalatriðið er að standa í ístaðið og hlaupa undir bagga ef einhverjir heltast úr lestinni.

Aðgangur ókeypis. Fjölda- og fjarlægðartakmarkanir virtar. Allir velkomnir.